Një situatë tronditëse është regjistruar në aksin Librazhd–Prrenjas, ku shembja e rrugës ka vënë në rrezik jetën e një pacienteje dhe ka nxjerrë në pah dështimin total të funksionimit të shërbimeve emergjente.
Një ambulancë që transportonte një grua me këmbë të thyer drejt Spitalit të Elbasanit u bllokua nga rrëshqitja e dherave dhe gurëve në zonën e Kthesave të Dragostunjës. Për shkak të pamundësisë për të vijuar rrugën, stafi mjekësor u detyrua të ndërhyjë në mënyrë ekstreme.
Pacientja u nxor nga ambulanca dhe u transportua me barrelë përmes lumit pranë aksit rrugor, për t’u kaluar në anën tjetër dhe për të vazhduar më pas dërgimin drejt spitalit me një mjet tjetër. Pamjet nga vendngjarja tregojnë një skenë alarmante, ku shëndeti i pacientes vihet në rrezik për shkak të mungesës së aksesit rrugor.
Ngjarja ka shkaktuar indinjatë të fortë, pasi një aks kombëtar i bllokuar ka detyruar mjekët të veprojnë në kushte që nuk i përkasin një sistemi normal shëndetësor. Qytetarët dhe familjarët e pacientes e kanë cilësuar situatën si skandaloze dhe të papranueshme.
Ky rast vjen në një moment kur për orë të tëra qarkullimi në aksin Librazhd–Prrenjas ka qenë i paralizuar, duke izoluar zona të tëra dhe duke rrezikuar drejtpërdrejt jetën e qytetarëve, veçanërisht në rastet emergjente.
Ngjarja ka rihapur debatin për sigurinë rrugore, mirëmbajtjen e infrastrukturës dhe përgjegjësinë institucionale, ndërsa qytetarët kërkojnë masa urgjente që situata të tilla të mos përsëriten më.
