Shqipëria po përballet me një shtim të rasteve të virozave respiratore, një situatë e pritshme për këtë periudhë të vitit.
Sipas infeksionistes Eugena Tomini nga Instituti i Shëndetit Publik, aktualisht në qarkullim janë gripi A dhe B, virusi respirator sincicial (RSV) dhe Covid-19.
Tomini thekson rëndësinë e kujdesit të shtuar dhe parandalimit të komplikacioneve, duke këshilluar qytetarët të konsultohen me mjekun e familjes ose specialistin për një diagnozë dhe trajtim të duhur. Ajo rekomandon gjithashtu vaksinimin kundër gripit sezonal për të shmangur format e rënda të sëmundjes dhe respektimin e higjienës respiratore si një masë efikase për të frenuar përhapjen e infeksioneve.
