Hetimet për ekzekutimin e biznesmenit Mondi Mëhalla (Edmond Hyka), i ndodhur më 30 nëntor, po zbulojnë gjithnjë e më shumë detaje mbi konfliktin e thellë financiar që dyshohet se çoi në vrasjen e tij. Policia e Elbasanit ka identifikuar si person kyç të dosjes 35-vjeçarin Oklid El Ouejdi, të njohur me nofkat “Kiço” dhe “Oliver”, i konsideruar nga komuniteti lokal si nip i personazhit të njohur “Timi i Elbasanit”.
Sipas burimeve të Policisë së Shtetit, El Ouejdi është larguar nga Shqipëria përmes pikës kufitare të Qafë-Thanës dhe dyshohet se ndodhet në Maqedoninë e Veriut, ku ka lidhje të shumta, përfshirë edhe personazhin e njohur Sheval Muharremi, i quajtur “Bosi i Gërçecit”.
Konflikti për 700 mijë euro
Në qendër të hetimeve është kompania e tij “SOLEIL”, një biznes import–eksporti dhe tregtimi automjetesh, i regjistruar në Elbasan prej vitit 2018. Pikërisht marrëdhëniet tregtare që El Ouejdi kishte me Mëhallën dyshohet se çuan në një konflikt të rëndë financiar.
Rreth 10 ditë para vrasjes, të dy janë përplasur fizikisht në ambientet e karburantit “Xhaxhi Oil”. Konflikti dyshohet se lidhej me një marrëveshje të pazgjidhur prej 700 mijë eurosh. Sipas burimeve, El Ouejdi mund të ketë ofruar si kompensim katër apartamente në Tiranë, të cilat dyshohet se kishin probleme pronësie, çka e ka acaruar më tej situatën mes tyre.
Hetuesit dyshojnë se pas konfliktit, El Ouejdi ka ndërmarrë hapa për organizimin e atentatit.
Tre të arrestuar, dy të kërkuar
Deri tani janë arrestuar tre persona të dyshuar për rol mbështetës në ngjarje:
- Nevzat (Nevi) Spaho, nga Përrenjasi – i dyshuar si shoferi që ndihmoi autorin të largohej.
- Kujtim Pisha, punonjës karburanti – i proceduar për moskallëzim krimi.
- Xhino Ago, ortak i Mëhallës – akuzohet për mosndryshimin e pronësisë së mjetit “Audi” të përdorur në atentat.
Në kërkim vijojnë të jenë:
- Armando Kola, nga Laçi,
- Marselo Arani, nga Elbasani, i cili ka thyer edhe masën e “arrestit në shtëpi”.
Roli i Naldi Gjinit në hetim
Një rol të rëndësishëm në zbardhjen e skemës ka luajtur Naldi Gjini. Ai u shoqërua fillimisht si përdorues i “Audi”-t, por u la i lirë pas bashkëpunimit me hetuesit. Gjini ka identifikuar në foto Spahon, Kolën dhe Aranin, duke ndihmuar hetimin. Pamjet filmike të siguruara nga një garazh në zonën e “21 Dhjetorit” tregojnë Aranin duke përdorur mjetin pak ditë para vrasjes.
Pista kryesore e hetimit
Grupi hetimor mbetet i fokusuar tek konflikti financiar mes Mëhallës dhe El Ouejdit. Mosmarrëveshja për 700 mijë euro, përplasja fizike dhe tensionet e vazhdueshme konsiderohen si motivet kryesore që çuan në ekzekutimin e biznesmenit, i cili u qëllua me tre plumba nga autorë ende të paidentifikuar.
Mjeti i përdorur në atentat u gjet i djegur, në përputhje me modus operandi të grupeve kriminale.
Hetimet në vijim
Oklid El Ouejdi mbetet personi që autoritetet duan ta marrin urgjentisht në pyetje. Policia po punon për lokalizimin e tij në bashkëpunim me autoritetet fqinje, ndërsa priten të reja të rëndësishme në ditët e ardhshme.
