Kryetari i Partisë Mundësia, deputeti Agron Shehaj, ka reaguar ashpër ndaj vendimit të Gjykatës Kushtetuese, e cila me votë 5 me 3 pezulloi përkohësisht masën e pezullimit nga detyra për zëvendëskryeministren dhe ministren e Infrastrukturës, Belinda Balluku, deri në shqyrtimin e çështjes më 22 janar.
Në një video-mesazh të publikuar në rrjetin social Facebook, Shehaj u shpreh se vendimi i Kushtetueses nuk është gjë tjetër veçse një shtyrje në kohë, që sipas tij i shërben kryeministrit Edi Rama.
“Gjykata Kushtetuese zgjodhi të mbrojë Ramën dhe Ballukun, duke i dhënë kryeministrit vetëm pak kohë më shumë, asgjë më tepër,” deklaroi Shehaj.
Sipas deputetit, Gjykata Kushtetuese duhej të kishte lënë në fuqi masën e pezullimit nga detyra, duke mbajtur një qëndrim të qartë përballë akuzave të ngritura nga SPAK.
“Në përplasjen mes drejtësisë dhe qeverisë së korruptuar të Edi Ramës, Gjykata Kushtetuese mbajti anën e të korruptuarve, duke e rikthyer në detyrë Belinda Ballukun,” tha ai.
Shehaj theksoi se vendimi nuk e shpëton zëvendëskryeministren nga përgjegjësia penale, por synon të mbrojë politikisht kryeministrin.
“Ky vendim nuk e shpëton Ballukun. Synon të shpëtojë Ramën, i cili mendon se është i paprekshëm dhe se drejtësia nuk mund ta pezullojë apo arrestojë. Kjo nuk është e vërtetë. Me këtë vendim, Rama thjesht fitoi pak më shumë kohë. Fati i tij është vendosur në Perëndim,” përfundoi Shehaj.
Belinda Balluku është marrë e pandehur nga SPAK për veprën penale të shkeljes së barazisë në tendera, në lidhje me procedurat e tunelit të Llogarasë dhe Lotit 4 të Unazës së Madhe. Për të, GJKKO ka vendosur masat e sigurisë: pezullim nga detyra, bllokim të pasaportës dhe ndalim për të dalë jashtë vendit, ndërsa çështja pritet të shqyrtohet në themel nga Gjykata Kushtetuese më 22 janar.
