Shtetet e Bashkuara kanë ndërmarrë një aksion të rëndësishëm kundër aktivitetit kibernetik të lidhur me Iranin, duke bllokuar disa platforma të përdorura nga grupet e hakerëve.
Departamenti Amerikan i Drejtësisë njoftoi se janë sekuestruar katër domain-e të përdorura nga grupe të lidhura me Ministrinë e Inteligjencës dhe Sigurisë së Iranit (MOIS), të cilat shërbenin për sulme kibernetike dhe operacione propagandistike.
Domenet e bllokuara – Justicehomeland[.]org, Handala-Hack[.]to, Karmabelow80[.]org dhe Handala-Redwanted[.]to – përdoreshin për publikimin e të dhënave të vjedhura, marrjen e përgjegjësisë për sulme dhe nxitjen e dhunës ndaj kundërshtarëve të regjimit iranian.
Sipas autoriteteve amerikane, këto platforma kanë qenë të përfshira edhe në publikimin e dokumenteve të ndjeshme të vjedhura nga institucionet shqiptare, në vitet 2022.
Motivi i këtyre sulmeve lidhet me qëndrimin e Shqipërisë ndaj grupit opozitar iranian MEK, i cili është strehuar në territorin shqiptar dhe ka kundërshtuar regjimin në Teheran.
Autoritetet amerikane theksuan se hetimet vijojnë dhe paralajmëruan se të gjithë personat e përfshirë në këto aktivitete do të përballen me drejtësinë.
