Kryetari i Partia Demokratike, Sali Berisha, deklaroi se gara për drejtimin e partisë më 23 maj, edhe pse me një kandidat të vetëm, mbetet sipas tij një proces modern dhe demokratik.
Gjatë një komunikimi publik, Berisha theksoi se parimi “një anëtar, një votë” garanton legjitimitetin e procesit dhe e cilësoi atë si formën më të lartë të demokracisë brenda partisë.
Sipas tij, çdo demokrat ka pasur mundësinë të kandidojë, por kandidaturat duhet të përmbushin kriteret statutore dhe politike të forcës politike.
“Çdo demokrat e demokrate është i mirëpritur në garë. Por jo bashkëpunëtorët e qeverisë dhe të krimit. Nuk ka forcë politike në botë që pranon një gjë të tillë”, deklaroi Sali Berisha.
Ai shtoi se kriteret për kandidim nuk janë vendosur posaçërisht për këtë proces, por kanë ekzistuar prej kohësh dhe lidhen me eksperiencën drejtuese në nivele vendore apo qendrore.
Berisha hodhi poshtë akuzat për mungesë gare reale, duke deklaruar se nuk ka ndërhyrë asnjëherë për të krijuar kandidatura artificiale.
“Kurrë nuk kam lejuar dhe nuk i lejoj vetes të operoj me falsitete, të krijoj kandidatura apo t’i lutem dikujt të kandidojë”, u shpreh ai.
Kreu demokrat kritikoi edhe mediat dhe kundërshtarët politikë, duke i akuzuar se po sulmojnë procesin në PD, ndërsa sipas tij nuk reagojnë ndaj faktit që kreu i Partia Socialiste nuk është votuar nga anëtarësia prej vitesh.
Në të njëjtën kohë, Berisha konfirmoi pjesëmarrjen e tij në Forumin e International Democracy Union për vitin 2026 në Zagreb, ku pritet të marrë pjesë në panelin kushtuar Ballkanit Perëndimor.
