Gjykata e Posaçme ka zbardhur vendimin me të cilin la në fuqi masën e ndalimit për daljen jashtë vendit ndaj zv/kryeministres Belinda Balluku. Vendimi, i dorëzuar mbrojtjes, argumenton se ekziston rreziku real që ajo t’i shmanget drejtësisë, duke u bazuar në peshën e akuzës dhe marzhin e dënimit që parashikon ligji.
Në arsyetim thuhet se, për shkak të rrezikut të arratisjes, bllokimi i pasaportës është i domosdoshëm për të garantuar vijimin normal të hetimit dhe procesit penal. Gjykata vlerëson se masa është proporcionale dhe e nevojshme në këtë fazë të procedimit.
Sa i përket pezullimit nga detyra, gjykata sqaron se nuk mund të shprehet, pasi çështja ndodhet ende në shqyrtim nga Gjykata Kushtetuese. Për këtë arsye, vendimmarrja mbi këtë masë mbetet e pezulluar deri në një vendim përfundimtar.
Ndërkohë, SPAK ka vijuar veprimet hetimore, duke kryer kontrolle dhe sekuestrime të reja ndaj dhjetëra subjekteve, me qëllim mbledhjen dhe ruajtjen e provave. Prokuroria ka argumentuar në seancë se ekziston rreziku i prishjes së provave dhe intimidimit të dëshmitarëve, çka ka ndikuar në vlerësimin e gjykatës për nevojën e masave kufizuese.
Çështja pritet të marrë zhvillime të reja në javët në vijim, në pritje të mbledhjes së Këshillit të Mandateve dhe vendimit të Gjykatës Kushtetuese.
