Mbrëmjen e së martës, protesta qytetare në Tiranë mori një zhvillim të pazakontë, kur një pjesë e protestuesve u drejtuan drejt hapësirës së “Fan Zone” në Sheshin “Skënderbej”, ku ishin mbledhur qytetarë për të ndjekur ndeshjet e Kampionatit Botëror.
Pas marshimit në rrugët kryesore të kryeqytetit, turma e protestuesve hyri në zonën e dedikuar për tifozët, duke vazhduar thirrjet dhe sloganet e tyre kundër qeverisë. Sipas dëshmitarëve në vendngjarje, atmosfera e protestës u ndërthur me aktivitetin sportiv që po zhvillohej në shesh.
Thirrjet “Rama ik!” dhe “Rama jep dorëheqje!” u dëgjuan vazhdimisht nga pjesëmarrësit, ndërsa protestuesit vijuan marshimin në mënyrë paqësore brenda dhe përreth hapësirës së organizuar për transmetimin e ndeshjeve.
Prania e protestuesve krijoi një situatë të veçantë në qendër të Tiranës, ku aktiviteti sportiv dhe manifestimi qytetar u zhvilluan paralelisht në të njëjtën hapësirë publike.
Organizatorët e protestës deklaruan se qëllimi i tyre ishte të përcillnin mesazhin e pakënaqësisë qytetare në çdo pjesë të kryeqytetit, duke theksuar se protesta do të vijojë edhe në ditët e ardhshme.
Ndërkohë, nuk u raportuan incidente apo përplasje, ndërsa forcat e rendit monitoruan situatën për të garantuar mbarëvajtjen e aktivitetit dhe sigurinë e qytetarëve të pranishëm në shesh.
