Një valë e re mashtrimesh online është evidentuar ditët e fundit në Shqipëri, ku qytetarët po bien pre e skemave të ashtuquajtura “phishing” përmes mesazheve SMS.
Mashtruesit dërgojnë mesazhe duke u paraqitur si institucione të njohura si Policia Rrugore apo Posta Shqiptare, duke njoftuar për:
- gjoba të papaguara
- pako të padorëzuara
Në mesazh përfshihet një link i rremë që imiton faqe zyrtare. Pasi klikojnë, përdoruesit ftohen të japin të dhënat e kartës bankare, të cilat përfundojnë në duart e mashtruesve.
Eksperti i sigurisë kibernetike Juled Mardodaj shpjegon se kjo është një nga format më të përhapura të mashtrimit në botë dhe synon vjedhjen e të dhënave personale dhe financiare.
Ndërkohë, Autoriteti Kombëtar për Sigurinë Kibernetike ka nisur bashkëpunimin me operatorët telefonikë dhe bankat për të bllokuar domenet mashtruese dhe për të kufizuar dëmet.
Si të mbroheni:
- Mos klikoni linke nga SMS apo email të panjohura
- Kontrolloni gjithmonë adresën (URL) të faqes
- Mos jepni të dhëna bankare përmes linkeve
- Raportoni menjëherë mesazhet e dyshimta
Ekspertët theksojnë se një verifikim i thjeshtë para klikimit mund të shmangë humbje financiare dhe vjedhje të të dhënave personale.
