Kryeministrja e Italisë, Giorgia Meloni, ka reaguar ashpër pas protestave të dhunshme të zhvilluara në disa qytete të vendit kundër organizimit të Lojërave Olimpike Dimërore.
Në një deklaratë publike, Meloni i cilësoi protestuesit si “armiq të Italisë”, duke i akuzuar për përplasje të rënda me forcat e policisë dhe për sabotim të infrastrukturës hekurudhore.
“Armiqtë e Italisë po demonstrojnë kundër Lojërave Olimpike, duke bërë që këto pamje të transmetohen në televizione në të gjithë botën. Disa prej tyre kanë prerë kabllot hekurudhore për të penguar nisjen e trenave,” deklaroi Meloni.
Ajo shprehu solidaritet me forcat e rendit, qytetin e Milanos dhe qytetarët që, sipas saj, po shohin punën dhe përpjekjet e tyre të shkatërruara nga akte kriminale.
Autoritetet italiane po hetojnë incidentet dhe kanë paralajmëruar masa të ashpra ligjore ndaj personave të përfshirë në dhunë dhe sabotim.
