Deputetja e Partisë Demokratike, Jorida Tabaku, ka reaguar në lidhje me zhvillimet e fundit në Bruksel për procesin e integrimit të Shqipërisë në Bashkimin Europian, duke komentuar rezolutat e Parlamentit Europian mbi zgjedhjet e 11 majit.
Në një intervistë, Tabaku theksoi se Parlamenti Europian është i shqetësuar për mënyrën si u zhvilluan këto zgjedhje, të cilat ishin të parat që zhvillohen me kapitujt e negociatave të hapura me BE-në. Ajo nënvizoi se tashmë nuk ka më vend për tolerime në raport me standardet demokratike.
Sipas saj, problematikat e denoncuara për zgjedhjet përfshijnë presionin mbi administratën publike, përdorimin e burimeve shtetërore, si dhe lidhjen e korrupsionit me krimin e organizuar. Të gjitha këto, shtoi ajo, janë pjesë e kapitullit të parë të negociatave që përfshin çështjet themelore.
