Serbia është vendi më me ndikim në mesin e vendeve kandidate për anëtarësim, por nuk është reale që të hyjë në Bashkimin Evropian me lidershipin aktual, i cili është ulur në katër karrige, u tha në një konferencë për shtyp të përfaqësuesve socialdemokratë përgjegjës për zgjerimin. “Është mendimi im i sinqertë se ambicia e presidentit Aleksandër Vuçiç nuk është të anëtarësohet në Bashkimin Evropian, sepse kjo do të nënkuptonte se ai dhe opsioni i tij duhet të respektojnë rregullat dhe standardet shumë strikte të BE-së në lidhje me sistemin demokratik, lirinë e medias, minoritetet dhe çështje të tjera. Në vend të kësaj, ai po luan lojërat e veta,” tha Tonino Picula , Parlamentari Evropian i Serbisë.
Picula, së bashku me deputeten belge Kathleen Van Brempt , e cila është përgjegjëse për zgjerimin në klubin parlamentar të socialdemokratëve, dhe raportuesin për Shqipërinë, deputetin austriak Andreas Schieder, folën për rolin e zgjerimit në kontekstin aktual gjeopolitik. Përfaqësuesi socialdemokrat kroat tha se Serbia po udhëheq të ashtuquajturën politikë të jashtme multivektoriale. “Ka katër shtylla të politikës së jashtme serbe – Bashkimi Evropian, Shtetet e Bashkuara, Rusia dhe Kina, dhe nuk mendoj se është e mundur të ulemi në katër karrige gjatë gjithë kohës. Unë nuk mendoj se ne ndajmë vlerat dhe qëllimet gjeopolitike me Kinën dhe Rusinë në shumicën e fushave, aq më pak me Shtetet e Bashkuara”, tha Picula. I pyetur nëse Serbia mund të hyjë në Bashkimin Evropian me lidershipin aktual, Picula është përgjigjur negativisht, duke theksuar se është e pamundur të ketë ambicie për të përfunduar negociatat deri në fund të vitit 2026, pa një ndryshim rrënjësor të pozicionit dhe sjelljes.
