Tensionet në Lindjen e Mesme janë rritur sërish pasi Franca ka kërkuar një mbledhje urgjente të Këshillit të Sigurimit të Kombeve të Bashkuara, pas avancimit të forcave izraelite në territorin libanez dhe marrjes nën kontroll të fortesës historike të Beaufort Castle.
Ministri i Jashtëm i Francës, Jean-Noël Barrot, deklaroi se megjithëse Franca njeh të drejtën e Izraelit për vetëmbrojtje ndaj sulmeve të Hezbollah, operacionet ushtarake të vazhdueshme dhe depërtimi më i thellë në territorin e Libanit nuk mund të justifikohen.
“Ky është një gabim i madh për Izraelin. Përparimi në territorin libanez bie ndesh me angazhimet e marra pas armëpushimit dhe me të drejtën ndërkombëtare”, u shpreh Barrot në një intervistë për mediat franceze.
Sipas ushtrisë izraelite, forcat e saj kanë marrë nën kontroll fortesën mesjetare Beaufort, një pikë me rëndësi strategjike në jug të Libanit, dhe kanë zgjeruar operacionet tokësore kundër Hezbollahut në zonë.
Pamje të publikuara nga mediat tregojnë flamurin izraelit të ngritur mbi fortesën historike, e ndërtuar fillimisht nga kryqtarët në shekullin XII. Ushtria izraelite e ka cilësuar objektin si një simbol të ndikimit të Hezbollahut në rajon.
Autoritetet izraelite deklaruan se operacionet po synojnë pozicionet dhe platformat e lëshimit të raketave që, sipas tyre, përdoren nga Hezbollahu për sulme kundër Izraelit.
Ndërkohë, Franca dhe vende të tjera perëndimore po kërkojnë respektimin e armëpushimit dhe shmangien e një përshkallëzimi të mëtejshëm të konfliktit, i cili rrezikon të destabilizojë edhe më shumë rajonin dhe të sjellë pasoja të rënda humanitare.
