Zhvillimet e fundit në Partia Demokratike e Shqipërisë vijojnë të shoqërohen me tensione dhe akuza për manipulim, ndërsa procesi i zgjedhjeve të brendshme në disa degë, përfshirë Korçën, është ndërprerë.
Përfaqësuesi i deputetit Ervin Salianji, Oresti Berberi, ka deklaruar se shumica e degëve kanë përfunduar zgjedhjen e kryetarëve, por ka pranuar se procesi nuk ka qenë pa probleme.
Sipas tij, një nga çështjet kryesore mbetet menaxhimi i listave të anëtarësisë, të cilat pas rithemelimit të partisë kanë pasur vështirësi në azhornim. Berberi theksoi se manipulime të listave janë evidentuar edhe në procese të mëparshme, si primaret dhe forumet rinore.
Në lidhje me qëndrimin e Salianjit, ai bëri të ditur se deputeti nuk do ta ndjekë rrugën ligjore për ta çuar çështjen në gjykatë, pasi kjo do të sillte një proces më kompleks për partinë.
“Nuk do ta çojë PD në dyert e gjykatës, pasi do ta komplikonte më tej situatën,” u shpreh ai.
Ndërkohë, Berberi nënvizoi se lëvizja politike e Salianjit do të vazhdojë me synimin për ta bërë Partinë Demokratike një forcë fituese, pavarësisht sfidave të brendshme.
Zhvillimet vijnë në një kohë kur brenda PD-së vijojnë përplasjet mes grupimeve të ndryshme, duke reflektuar një klimë të tensionuar politike dhe organizative.
