Presidenti i Rusisë, Vladimir Putin, zhvilloi një bisedë telefonike me presidentin iranian Masoud Pezeshkian për të diskutuar situatën e tensionuar në Lindjen e Mesme.
Sipas një deklarate të publikuar nga Kremlini, gjatë bisedës u diskutua konflikti i vazhdueshëm në rajon, i cili sipas Moskës është nxitur nga “sulmi izraelito-amerikan kundër Iranit”.
Putin theksoi gjatë telefonatës qëndrimin e Rusisë në favor të një uljeje të menjëhershme të tensioneve dhe të zgjidhjes së konfliktit përmes mjeteve politike dhe diplomatike.
“Presidenti rus riafirmoi qëndrimin e tij parimor në favor të një deeskalimi të shpejtë të konfliktit dhe të një zgjidhjeje me mjete politike”, thuhet në deklaratën e Kremlinit.
Telefonata me presidentin iranian vjen vetëm një ditë pasi udhëheqësi rus zhvilloi një bisedë telefonike edhe me presidentin e Shteteve të Bashkuara, Donald Trump, ku u diskutua gjithashtu situata e tensionuar në rajon dhe zhvillimet e fundit në konflikt.
