Një prej pjesëmarrësve në protestën e zhvilluar në Tiranë, Ilir Xhemaliaj, deklaroi se lëvizja qytetare do të vazhdojë deri në dorëheqjen e kryeministrit Edi Rama, duke theksuar se protestuesit kërkojnë gjithashtu ndryshim të klasës politike.
Në një lidhje televizive, Xhemaliaj u shpreh se protesta nuk synon vetëm largimin e kryeministrit, por edhe, sipas tij, përfundimin e modelit politik të ndërtuar gjatë tre dekadave të fundit.
“Deri në dorëheqjen e Ramës nuk tërhiqemi. Rama mbaroi, Berisha mbaroi. Ne kërkojmë ndryshimin e të gjithë kastës politike 30-vjeçare”, deklaroi ai.
Sipas Xhemaliajt, pesë kërkesat e protestës janë formuluar nga vetë qytetarët që marrin pjesë në tubime, ndërsa organizatorët kanë shërbyer vetëm për t’i artikuluar dhe bërë publike.
Ai e cilësoi protestën si një lëvizje me pjesëmarrje të gjerë qytetare, duke përmendur praninë e të rinjve, pensionistëve, punonjësve dhe përfaqësuesve të shtresave të ndryshme të shoqërisë.
Xhemaliaj tha gjithashtu se marshimet e përditshme do të vazhdojnë, duke u bërë thirrje qytetarëve t’u bashkohen protestave në ditët në vijim.
