Ish-presidenti Ilir Meta ka depozituar një kallëzim penal ndaj Drejtorit të Përgjithshëm të Burgjeve, Klevis Qose, duke e akuzuar për shpërdorim detyre dhe shkelje të rënda ligjore gjatë trajtimit të tij në paraburgim.
Kallëzimi është dorëzuar në Prokurorinë e Posaçme dhe lidhet me mënyrën e ekzekutimit të masës së sigurisë, kushtet e trajtimit dhe veprimet apo mosveprimet e drejtuesve të sistemit penitenciar.
Meta kërkon:
- regjistrimin e procedimit penal;
- hetim të plotë të veprimeve dhe mosveprimeve të Drejtorit të Burgjeve;
- verifikimin e përgjegjësisë penale për disa vepra të rënda, përfshirë shpërdorimin e detyrës, veprime arbitrare, mosmarrjen e masave për të ndaluar gjendje të paligjshme dhe shkeljen e barazisë së shtetasve.
Sipas kallëzimit, nga sjellja e drejtuesit të burgjeve është cenuar trajtimi i ligjshëm dhe i barabartë, duke krijuar një situatë që kërkon ndërhyrje të menjëhershme të organit të akuzës.
