Rritja e vazhdueshme e çmimit të naftës në vend, në një kohë tensioni gjeopolitik në Lindjen e Mesme, po shoqërohet me kritika të forta ndaj politikave fiskale dhe funksionimit të tregut të karburanteve në Shqipëri.
Eksperti i energjisë, Eduard Elezi, gjatë një interviste televizive, u shpreh se ndërhyrjet e qeverisë në çmime janë bërë pa analiza të mirëfillta dhe pa studime konkrete mbi efektet reale në ekonomi. Ai e cilësoi situatën si një “lojë kungulleshkash”, duke kritikuar mënyrën e menaxhimit të tregut.
Elezi solli në vëmendje edhe debatet për tarifimin e energjisë elektrike, duke përmendur propozimet për tarifa të diferencuara mbi 800 kWh, të cilat sipas tij janë bërë pa bazë studimore. Ai kritikoi gjithashtu qëndrimet e kryeministrit lidhur me nivelin e çmimit të naftës, që po i afrohet 220 lekëve për litër.
Sipas ekspertit, një nga problemet kryesore mbetet mungesa e konkurrencës në tregun e karburanteve, i cili, sipas tij, kontrollohet nga një numër i kufizuar kompanish. Ai ngriti shqetësimin për ekzistencën e një karteli, ku çmimet nuk reflektojnë uljet në tregjet ndërkombëtare.
“Kur çmimi bie jashtë, në Shqipëri nuk ulet. Kjo tregon një treg të komanduar”, deklaroi Elezi, duke kërkuar ndërhyrje nga institucionet për të garantuar konkurrencë të ndershme.
Ai u shpreh kritik edhe ndaj Bordit të Transparencës, duke theksuar se zgjidhja nuk qëndron vetëm te ky mekanizëm, por tek lufta ndaj praktikave monopoliste.
Në analizën e tij, Elezi u ndal edhe te sektori i energjisë elektrike, ku evidentoi diferenca të mëdha në çmime dhe ngriti pikëpyetje mbi menaxhimin e tregut dhe të ardhurave. Ai theksoi se prodhimi vendas mbulon një pjesë të madhe të konsumit, duke kërkuar më shumë transparencë në përdorimin e të ardhurave.
Eksperti kujtoi gjithashtu se Shqipëria ka pasur më herët kapacitete përpunimi të naftës dhe rikthimi i tyre do të ndikonte pozitivisht në uljen e çmimeve.
Në përfundim, ai theksoi se taksat e larta mbi karburantet mbeten një nga arsyet kryesore të çmimeve të larta, duke kërkuar ndërhyrje të menjëhershme nga qeveria për uljen e barrës fiskale dhe krijimin e një pakete mbështetëse për qytetarët dhe bizneset.
