Ministria e Infrastrukturës dhe Energjisë ka bërë të ditur se, pas stuhisë që përfshiu disa zona të vendit një natë më parë, situata është përmirësuar në pjesën më të madhe të territorit, ndërsa ekipet e emergjencës dhe të shërbimeve publike vijojnë punën për rikthimin e plotë të normalitetit.
Sipas ministrisë, ndërprerje të furnizimit me energji elektrike vijojnë të raportohen në pjesë të qarqeve Vlorë, Fier, Sarandë dhe Librazhd. Operatori i Sistemit të Shpërndarjes (OSSH) njofton se aktualisht janë jashtë funksionit 21 fidera dhe mbi 1,000 punonjës janë angazhuar në terren për riparimin e defekteve.
Si pasojë e mungesës së energjisë në stacionin e pompimit të Varibopit, qyteti i Patosit vijon të jetë pa furnizim me ujë të pijshëm. Ndërkohë, në Fier është riparuar defekti në stacionin e Kafarajt, duke rikthyer furnizimin normal me ujë.
Në Sarandë, autoritetet raportojnë se stacionet e pompimit të ujërave të ndotura janë rikthyer në funksion, ndërsa vijon puna për pastrimin e zonave të prekura dhe largimin e pemëve të rrëzuara.
Sa i përket infrastrukturës rrugore, Autoriteti Rrugor Shqiptar (ARRSH) njofton se akset kombëtare janë të kalueshme dhe qarkullimi vijon normalisht, ndërsa ekipet monitorojnë situatën dhe ndërhyjnë për pastrimin e materialeve të rëna në rrugë.
Në Portin e Durrësit, era e fortë rrëzoi disa kontejnerë bosh në terminalin e kontejnerëve. Sipas autoriteteve portuale, po kryhet vlerësimi i dëmeve në bashkëpunim me kompanitë përkatëse, ndërsa aktiviteti në sektorët e tjerë të portit vijon normalisht.
Në Aeroportin Ndërkombëtar të Tiranës u raportuan vetëm disa vonesa të lehta në mbërritjet e avionëve për shkak të kushteve atmosferike, ndërsa operimet kanë vijuar.
Ministria e Infrastrukturës dhe Energjisë bën me dije se strukturat përgjegjëse mbeten në gatishmëri deri në normalizimin e plotë të situatës.
Sqarim: Vlerësimi i plotë i dëmeve dhe pasojave të shkaktuara nga moti i keq vijon nga autoritetet kompetente dhe të dhënat mund të përditësohen në varësi të zhvillimeve.
