Ish-presidenti Ilir Meta, me një letër nga qelia e burgut, ka shprehur kritikën e tij për modelin aktual të ekonomisë shqiptare, duke e konsideruar atë si një dështim të theksuar.
Ai thekson se raporti i fundit i Fondit Monetar Ndërkombëtar (FMN) konfirmon analizën e PL-së mbi dështimin e modelit ekonomik të qeverisë aktuale dhe tregon se prioritetet e Partisë së Lirisë janë rruga më e drejtë për një ndryshim real dhe afrimin me standardet e Bashkimit Europian.
Sipas raportit të FMN, ekonomia shqiptare ka arritur rritje të mbështetur nga kërkesa e brendshme, përfshirë shërbimet dhe turizmin, por rritja afatmesme në periudhën 2014-2024 ka mbetur nën nivelet e para-krizës financiare globale të vitit 2008.
Ilir Meta thekson se sektorët më të rëndësishëm të ekonomisë, si industria, bujqësia dhe energjia, vazhdojnë të regjistrojnë rritje negative, duke reflektuar përkeqësimin e sektorëve të prodhimit të të mirave materiale.
