Kryetari i Partisë Republikane dhe deputeti Fatmir Mediu, gjatë një vizite zyrtare në Shtetet e Bashkuara të Amerikës, ka komentuar zhvillimet e fundit politike dhe situatën e sigurisë në vend, duke shprehur kritika të forta ndaj mënyrës se si po funksionon sot opozita shqiptare.
Gjatë një interviste për “News 24”, Mediu theksoi se opozita nuk mund të kufizohet vetëm në Tiranë, por duhet të shtrihet në të gjithë vendin, me takime të përditshme me qytetarët dhe aksione të vazhdueshme politike.
“Opozita të dalë në bazë, jo të mbetet vetëm në Kuvend”
Mediu vuri në dukje se strukturat opozitare kanë nevojë për një riorganizim të thellë dhe një analizë serioze të situatës, duke shtuar se foltoret apo protestat duhet të zhvillohen në çdo qytet të Shqipërisë.
“Opozita duhet të bëhet në çdo skaj të vendit dhe jo vetëm në Tiranë. Qytetarët duhen takuar, duhen dëgjuar. Opozita duhet të ngrihet në nivel tjetër dhe të shprehi vlerat e saj,”
– u shpreh Mediu.
Ai shtoi se lëvizja e deputetit Ervin Salianji nuk përbën rrezik për përçarjen e Partisë Demokratike, por përkundrazi i shërben riorganizimit të opozitës.
Kërkesa për bashkim opozitar: “Me këtë sistem zgjedhor nuk fitojmë dot të ndarë”
Mediu nënvizoi se opozita nuk mund të përballet me mazhorancën aktuale pa u bashkuar, duke theksuar rëndësinë e reflektimit dhe ribashkimit politik.
“Me këtë sistem zgjedhor dhe pa bashkim është e pamundur. Mirëkuptimin e parë PD duhet ta kërkojë me qytetarët, jo me PS,”
– deklaroi ai.
Referimi te raporti i ODIHR: “Zgjedhjet e deformuara, opozita nuk pati mesazh të qartë”
Duke iu referuar raportit të OSBE/ODIHR për zgjedhjet e 11 majit, Mediu u shpreh se dokumenti ekspozon problematika të thella në procesin zgjedhor, ndërsa opozita nuk arriti të transmetonte një mesazh të fortë dhe të bashkuar te votuesit.
Ai theksoi se duhet punuar më shumë me partnerët ndërkombëtarë për t’i ndërgjegjësuar mbi situatën politike dhe zgjedhore në Shqipëri.
Mediu: “Standardet e Ramës me drejtësinë janë të dyfishta”
Duke komentuar çështjen që përfshin zv/kryeministren Belinda Balluku, Mediu akuzoi kryeministrin Edi Rama për standarde të dyfishta në raport me drejtësinë.
Ai lidhi këtë edhe me procesin gjyqësor që po zhvillohet ndaj tij lidhur me dosjen “Gërdeci”, duke e quajtur të padrejtë dhe të motivuar politikisht.
“Po veprohet si në diktaturë. Ndërhyrja politike në ushtri është rreptësisht e ndaluar. Por ajo që dua të them është se qeveri më të korruptuar se kjo e Ramës nuk ka pasur kurrë Shqipëria,”
– deklaroi ai.
Takimet në SHBA: Informim mbi krizën politike, ekonomike dhe zgjedhore
Në fund, Mediu bëri të ditur se gjatë vizitës në SHBA ka zhvilluar takime me kongresmenë dhe senatorë amerikanë, të cilëve u ka paraqitur situatën e brendshme në Shqipëri, përfshirë:
- manipulimin e zgjedhjeve të 11 majit,
- rritjen e kriminalitetit,
- skandalet korruptive të qeverisë,
- dhe gjendjen e vështirë ekonomike.
