Një tjetër operacion kundër mashtrimeve me Call Center po zhvillohet në Tiranë me urdhër të SPAK. Aksioni, që ka nisur në orët e para të mëngjesit, po kryhet në bashkëpunim me BKH dhe efektivë të Policia e Shtetit.
Sipas burimeve, po ushtrohen kontrolle në disa ambiente të dyshuara si pjesë e aktivitetit të grupeve kriminale që operojnë përmes skemave mashtruese të Call Center-ave. Deri në këto momente nuk ka informacion zyrtar nëse ka persona të arrestuar, ndërsa operacioni vijon.
Ky aksion vjen në vazhdën e goditjeve të fundit ndaj rrjeteve të mashtrimit, ku pak ditë më parë Policia e Shtetit arrestoi 10 persona dhe shpalli në kërkim 4 të tjerë, të dyshuar për zhvatjen e rreth 50 milionë eurove nga shtetas europianë përmes skemave të mashtrimit financiar.
Gjithashtu, në muajin janar, SPAK arrestoi 8 anëtarë të një grupi tjetër kriminal që ushtronte aktivitetin në dy kulla në Tiranë, duke treguar përmasat dhe organizimin e këtyre rrjeteve.
Autoritetet vijojnë hetimet për dokumentimin e plotë të aktivitetit kriminal dhe identifikimin e personave të përfshirë, ndërsa operacionet kundër mashtrimeve me Call Center mbeten një prioritet për strukturat ligjzbatuese.
