Më 17 shkurt, në përvjetorin e Pavarësisë së Kosovës, në sheshin “Skënderbeu” në Prishtinë do të mbahet një marsh protestues në mbështetje të ish-drejtuesve të Ushtrisë Çlirimtare të Kosovës (UÇK) që po gjykohen në Hagë.
Organizatorët nga platforma “Liria ka emër” kanë përzgjedhur këtë datë me synimin për të dërguar një mesazh simbolik unifikimi dhe për t’iu drejtuar Gjykatës Speciale me thirrjen: “Drejtësi, jo politikë”.
Sipas përfaqësuesve të platformës, përgatitjet janë drejt përfundimit dhe janë zhvilluar takime me kryetarë komunash për koordinimin e pjesëmarrjes dhe organizimin logjistik të transportit. Ata theksojnë se iniciativa operon mbi baza vullnetare dhe synon përfshirjen e qytetarëve pa dallime partiake.
Organizatorët e konsiderojnë UÇK-në si pjesë të rëndësishme të historisë politike dhe shtetformuese të Kosovës, ndërsa shprehen se trajtimi i ish-pjesëtarëve të saj ka qenë i padrejtë dhe kërkon një qasje të rishikuar.
Protesta e 17 shkurtit pritet të jetë një nga tubimet më të mëdha të mbajtura së fundmi në mbështetje të ish-krerëve të UÇK-së, pas një sërë marshimesh të ngjashme në Prishtinë, Tiranë dhe qytete të tjera.
