Përshkallëzimi i konfliktit në Iran po shkakton shqetësime serioze në industrinë ndërkombëtare të aviacionit, ndërsa ekspertët paralajmërojnë mungesa të karburantit për avionë, anulime fluturimesh dhe rritje të çmimeve të biletave.
Shoqata e Aeroporteve Gjermane ka deklaruar se situata në rajon po ndikon drejtpërdrejt në transportin e naftës përmes Ngushtica e Hormuzit, një nga rrugët më të rëndësishme për furnizimin global me energji.
Drejtori ekzekutiv i ADV-së, Ralph Beisel, paralajmëroi se kompanitë ajrore mund të detyrohen të reduktojnë ndjeshëm operimet.
“Ne druhemi se do të anulohen edhe më shumë fluturime, veçanërisht nga linjat ajrore me kosto të ulët dhe drejt destinacioneve me më pak rëndësi turistike”, deklaroi Beisel për gazetën gjermane Welt.
Sipas tij, në skenarin më negativ gjatë vitit 2026, disa aeroporte mund të humbasin deri në 10 për qind të kapacitetit të tyre, duke prekur rreth 20 milionë pasagjerë në të gjithë Gjermaninë.
Kriza është përkeqësuar nga rritja e fortë e çmimit të kerosenit, i cili sipas ADV-së ka qëndruar për më shumë se dy muaj në nivele dy herë më të larta se para nisjes së konfliktit.
Analistët e sektorit paralajmërojnë se nëse tensionet në Lindjen e Mesme vazhdojnë, ndikimi mund të përhapet në gjithë industrinë globale të transportit ajror, me pasoja të drejtpërdrejta për pasagjerët dhe ekonominë ndërkombëtare.
