Deputeti i Partia Demokratike, Luçiano Boçi, ka komentuar zhvillimet e fundit brenda opozitës dhe procesin politik në selinë blu, duke theksuar se demokratët po kërkojnë stabilitet dhe vazhdimësi pas viteve të konflikteve të brendshme.
I ftuar në një emision televiziv, Boçi deklaroi se periudha e ndarjeve dhe përçarjeve në PD ka lënë pasoja, por sipas tij baza demokrate ka zgjedhur të mbështesë një drejtim që “e mbajti partinë të bashkuar në momentet më të vështira”.
“Demokratët, pas çarjeve, ndarjeve dhe luftës së brendshme, duan një vazhdimësi me besim dhe me shpresë të re, sepse e dimë shumë mirë cili e shpëtoi Partinë Demokratike në ditë të vështira dhe cili është personi që e mban atë të unifikuar”, u shpreh Boçi.
Sipas deputetit demokrat, mënyra se si u zhvillua procesi politik dhe mbështetja e ardhur nga anëtarësia tregojnë se ekziston ende besim te drejtimi aktual i partisë.
Ai shtoi se ky realitet duhet pranuar si nga mbështetësit, ashtu edhe nga kritikët brenda PD-së.
“Ky është realiteti në Partinë Demokratike. Duhet ta pranojnë të gjithë, edhe kritikët edhe ata që janë pro kësaj situate. E vërteta nuk mund të kamuflohet dhe nuk mund të fshihet”, deklaroi ai.
Boçi u shpreh gjithashtu se Partia Demokratike po hyn në një fazë të re politike, ku prioritet mbetet bashkimi i demokratëve dhe rikthimi i besimit brenda opozitës.
