Qytetarët vijuan edhe mbrëmjen e së enjtes marshimin në rrugët kryesore të Tiranës, në kuadër të ditës së 40-të të protestave kundër qeverisë së kryeministrit Edi Rama.
Pas grumbullimit dhe fjalimeve para Kryeministrisë, protestuesit u zhvendosën në akset kryesore të kryeqytetit, duke mbajtur pankarta, simbole të flamingove dhe duke artikuluar thirrje kundër qeverisë.
Gjatë marshimit u dëgjuan slogane si “Edi Rama jep dorëheqjen” dhe “Parlamenti i krimit”, ndërsa pjesëmarrësit kërkuan ndryshim, transparencë dhe llogaridhënie nga institucionet.
Sipas organizatorëve, protesta është pjesë e një mobilizimi qytetar që do të vazhdojë edhe në ditët në vijim, me synimin për të mbajtur në vëmendje kërkesat e protestuesve.
Marshimi i kësaj mbrëmjeje u zhvillua në vazhdën e protestave të organizuara gjatë javëve të fundit, ku qytetarë dhe mbështetës të opozitës kanë shprehur pakënaqësinë e tyre ndaj qeverisjes dhe situatës politike në vend.
