Kryetarët e bashkive të qarkut të Elbasan kanë kërkuar rishikimin e funksionimit të qarqeve gjatë një dëgjese në Komisioni i Reformës Territoriale, duke argumentuar se ato nuk po luajnë më rolin për të cilin janë krijuar.
Kreu i Bashkisë së Përrenjas, Nuri Belba, deklaroi se qarqet “nuk bëjnë asgjë”, ndërsa kërkoi që drejtuesit e njësive administrative të jenë më pranë qytetarëve dhe problemeve lokale.
Edhe kryebashkiaku i Belsh, Arif Tafaj, u shpreh se këshillat e qarqeve kanë dalë nga funksioni koordinues dhe sot janë thuajse inekzistente.
Sipas drejtuesve vendorë, reforma territoriale e vitit 2014 ka sjellë përmirësim në administrimin e bashkive, por ata kërkojnë më shumë kompetenca dhe decentralizim të shërbimeve nga qeveria qendrore.
“Njerëzit na telefonojnë edhe për probleme që nuk varen nga bashkia, si mungesa e infermierëve apo shërbimeve të tjera publike”, u shpreh Belba, ndërsa Tafaj theksoi se “Tiranë duhet të lëshojë kompetenca”.
Dëgjesa me bashkiakët e Elbasanit ishte e para në kuadër të konsultimeve për reformën administrativo-territoriale. Në javët në vijim, në komision pritet të dëgjohen drejtues vendorë nga të gjitha qarqet e vendit.
Si mazhoranca ashtu edhe opozita kanë shprehur rezerva për funksionimin aktual të qarqeve dhe po diskutojnë mundësinë e zëvendësimit të tyre me rajone më të mëdha administrative.
