Për më shumë se 4 orë kreu i Prokurorisë së Posaçme Altin Dumani, “ndërroi” dje rolin në Kuvend dhe nga hetues, u mor në pyetje nga deputetët. Por përgjigjet e tij, në seancën maratonë të raportimit të kreut të SPAK ngjallën tension dhe panik te politika, pasi drejtësia ka në dorë disa dosje të bujshme dhe kjo e ka bërë që të vihet në epiqendër edhe të sulmeve politike. Megjithëse Dumani prezantoi raportin e SPAK për vitin 2023, interesi më i madh i deputetëve kryesisht atyre të opozitës kishte të bënte me hetimet aktuale të prokurorisë, teksa i drejtuan dhjetëra pyetje kreut të Prokurorisë së Posaçme.
Gazment Bardhi, kreu i grupit parlamentar të PD-së, ishte i pari që adresoi pyetjet në drejtim të Dumanit, ndër të cilat u fokusuan edhe tek hetimi për inceneratorët dhe çështja ‘Xibraka’, siç e quan deputeti i PD-së. Pyetjes së Bardhit se pse po zgjasin hetimet për inceneratorin e Tiranës, Dumani ju përgjigj duke arsyetuar se hetimi është i vështirë sidomos kur vjen puna për çështje me natyrë korruptive. Dumani tha se po hetohet roli i kujtdo që është i përfshirë në këtë aferë. “Hetimi është i vështirë, sidomos kur vjen puna të çështje me natyrë korruptive, që kanë më të vështirë për tu hetuar.
Vazhdon të hetohet, çdo fakt dhe verifikohet pozicioni dhe përfshirja e çdo personi, është shumë kompleks”, tha kreu i SPAK. Sa i takon çështje së Xibrakës, Dumani tha se çështja në hetim. I pyetur nga Bardhi nëse ka shkëmbyer mesazhe me kryeministrin Edi Rama, përmes një funksionari publik, që të mbyllë dosjen, kreu i SPAK tha se marrëdhëniet e tij me kreun e qeverisë janë vetëm institucionale dhe procedurale. “Nuk marr dhe nuk përcjell asnjë lloj mesazhi, ushtroj detyrën time në përputhje me dispozitat ligjore,” tha Dumani.
