Deputeti i Partisë Demokratike, Saimir Korreshi, ka ngritur akuza të forta për krim elektoral lidhur me zgjedhjet e 11 majit, duke pretenduar se procesi është shoqëruar me presion ndaj qytetarëve dhe përdorim të burimeve shtetërore për qëllime elektorale.
I ftuar në një emision televiziv, Korreshi deklaroi se gjatë fushatës janë përdorur fonde të buxhetit të shtetit për të ndikuar te votuesit, veçanërisht përmes vendimeve të qeverisë për shpërndarjen e ndihmave financiare dhe pensioneve pak para zgjedhjeve.
Sipas tij, këto masa përbëjnë një formë të blerjes së votës, pasi janë përdorur para publike për të siguruar mbështetje elektorale.
Korreshi akuzoi gjithashtu strukturat e patronazhistëve për ushtrim presioni ndaj qytetarëve, duke pretenduar se ata kishin akses në të dhëna personale të qytetarëve përmes sistemeve shtetërore.
Ai tha se qytetarët janë monitoruar deri në detaje, duke përfshirë aktivitetin në rrjetet sociale, ndërsa sipas tij shumë biznese dhe individë janë ndjerë të kërcënuar për shkak të bindjeve politike.
Deputeti demokrat shtoi se institucione të ndryshme shtetërore janë përdorur gjatë fushatës për të ushtruar ndikim mbi votuesit dhe për të siguruar vota për mazhorancën.
Sipas tij, pavarësisht referimeve dhe denoncimeve të bëra pranë institucioneve të drejtësisë, deri tani nuk ka pasur reagim për këto raste.
