Udhëheqësi i Koresë së Veriut, Kim Jong Un, mori pjesë në një ceremoni për mirëpritjen e njësitit të ushtrisë koreanoveriore pas kthimit nga një mision në Rusi, raportoi agjencia shtetërore KCNA.
Në fjalimin e tij, Kim lavdëroi oficerët dhe ushtarët e Regjimentit të 528-të të Inxhinierëve të Ushtrisë Popullore Koreane (KPA) për “sjellje heroike” gjatë një dislokimi 120-ditor jashtë vendit. Në videon e publikuar nga KCNA shihet Kim duke përqafuar ushtarë, përfshirë një ushtar në karrocë invalidi, dhe trupat duke u mirëpritur me entuziazëm nga turma dhe zyrtarë të lartë.
Sipas raportimeve, njësiti kishte kryer detyra luftarake dhe inxhinierike në rajonin e Kurskut në Rusi, gjatë luftës së Moskës në Ukrainë. Ministria e Mbrojtjes e Rusisë tha se trupat koreanoveriore ndihmuan në zmbrapsjen e një inkursioni ukrainas dhe më pas morën pjesë në pastrimin e zonës nga minat.
Më shumë se 6,000 ushtarë nga Koreja e Veriut humbën jetën gjatë misionit, ndërsa Kim tha se nëntë ushtarë të regjimentit humbën jetën gjatë këtij misioni, duke i përshkruar si “humbje që copëtojnë zemrën”. Regjimenti do të nderohet me Urdhrin e Lirisë dhe Pavarësisë.
Ceremonia u zhvillua në Phenian dhe u ndoq nga zyrtarë të lartë ushtarakë, udhëheqës partie, familjarë të ushtarëve dhe qytetarë të shumtë. Kim vlerësoi disiplinën, unitetin dhe besnikërinë absolute ndaj partisë dhe shtetit, duke e quajtur sjelljen e njësitit shembull për të gjitha forcat e armatosura.
Koreja e Veriut ka lavdëruar më parë trupat që luftuan për Rusinë, duke i rikthyer ata në vend dhe duke organizuar ceremoni të ndryshme për nderimin e tyre.
