Zëvendëspresidenti i Shteteve të Bashkuara, J. D. Vance, deklaroi se operacionet ushtarake në Iran do të vazhdojnë për një periudhë të shkurtër, me synimin për të siguruar një efekt afatgjatë në dobësimin e Republikës Islamike.
Në një intervistë, Vance theksoi se shumica e objektivave ushtarake janë arritur, por shtoi se SHBA do të vazhdojë ndërhyrjen për të garantuar që Irani të mos përbëjë kërcënim për një kohë të gjatë.
Sipas tij, qëllimi kryesor është “neutralizimi” i kapaciteteve të Iranit, veçanërisht në lidhje me programin bërthamor dhe aktivitetet që, sipas Uashingtonit, kërcënojnë sigurinë ndërkombëtare.
Ai pranoi se konflikti ka ndikuar në rritjen e çmimeve të energjisë, por e cilësoi këtë si një efekt të përkohshëm. Vance u shpreh optimist se, pas përfundimit të operacioneve, çmimet do të stabilizohen.
“Ne nuk jemi të interesuar të qëndrojmë në Iran për vite. Qëllimi është të përfundojmë misionin dhe të largohemi,” tha ai, duke sugjeruar se konflikti mund të jetë relativisht afatshkurtër, pavarësisht objektivave strategjikë afatgjatë.
Deklaratat e tij vijnë në një moment përshkallëzimi të tensioneve në Lindjen e Mesme, ku zhvillimet ushtarake dhe energjetike po ndikojnë drejtpërdrejt në ekonominë globale.
