Izrael ka miratuar një marrëveshje multimiliardëshe me Shtetet e Bashkuara të Amerikës për blerjen e dy grupeve të avionëve luftarakë, në një lëvizje që synon forcimin e kapaciteteve ushtarake për dekadat e ardhshme.
Marrëveshja përfshin avionë shumëfunksionalë F-35 nga kompania Lockheed Martin, si dhe avionë luftarakë F-15IA nga Boeing, sipas njoftimit të Ministrisë së Mbrojtjes izraelite.
Ministri i Mbrojtjes, Israel Katz, deklaroi se ky plan synon të “sigurojë epërsinë ajrore të Izraelit për dekadat e ardhshme”, duke e cilësuar si pjesë kyçe të strategjisë së sigurisë kombëtare.
Avionët F-35 konsiderohen ndër më të avancuarit në botë dhe tashmë janë pjesë e flotës izraelite, ndërsa modeli F-15IA pritet të shtojë më tej kapacitetet operacionale të forcave ajrore.
Forca ajrore izraelite ka luajtur një rol vendimtar në konfliktet e fundit në rajon, përfshirë operacionet në Gaza dhe përplasjet me Iran, ku janë kryer sulme me rreze të gjatë veprimi.
Kjo marrëveshje vjen në një kohë kur Izraeli ka rritur ndjeshëm shpenzimet ushtarake, pas tensioneve të vazhdueshme në Lindjen e Mesme dhe përballjeve me grupe si Hamas dhe Hezbollahu.
Zyrtarët izraelitë theksojnë se investimet në mbrojtje janë thelbësore për ruajtjen e sigurisë kombëtare në një mjedis rajonal gjithnjë e më të paqëndrueshëm.
