Një takim i Niko Peleshi me emigrantët shqiptarë në Irlandë është shoqëruar me tensione dhe kritika të forta nga diaspora.
Gjatë aktivitetit, disa qytetarë shqiptarë i kanë kërkuar hapur Peleshit heqjen e imunitetit për Belinda Balluku, duke e lidhur këtë me nevojën për forcimin e luftës kundër korrupsionit dhe avancimin e procesit të integrimit në Bashkimin Evropian.
Sipas tyre, korrupsioni dhe mungesa e ndëshkimit për zyrtarët e lartë janë ndër arsyet kryesore që kanë nxitur largimin masiv të shqiptarëve nga vendi.
Takimi, që pritej të kishte karakter informues dhe bashkëbisedues, mori një drejtim më kritik, ndërsa pjesëmarrësit ngritën shqetësime për situatën politike dhe ekonomike në Shqipëri.
Në momentet e debatit, Peleshi u vu përballë pyetjeve direkte lidhur me akuzat për korrupsion dhe rolin e institucioneve në trajtimin e këtyre çështjeve.
Ngjarja pasqyron pakënaqësinë e një pjese të diasporës shqiptare, e cila kërkon më shumë transparencë dhe përgjegjësi nga politika, si dhe hapa konkretë drejt integrimit evropian.
