Zgjedhjet parlamentare në Hungari po zhvillohen me një interes të jashtëzakonshëm, duke shënuar pjesëmarrje rekord që në orët e para të votimit.
Procesi nisi në orën 06:00 të mëngjesit, ndërsa rreth 7.5 milionë qytetarë kanë të drejtë vote. Të dhënat paraprake tregojnë një rritje të ndjeshme të pjesëmarrjes krahasuar me zgjedhjet e mëparshme.
Vetëm një orë pas hapjes së qendrave të votimit, 3.46% e votuesve kishin hedhur votën, krahasuar me 1.82% katër vite më parë. Deri në orën 09:00, pjesëmarrja arriti në 16.9%, ndërsa në orën 11:00 shifra u rrit në 37.98%, një nivel i paprecedentë për mëngjesin e zgjedhjeve në vend.
Kryeministri Viktor Orbán, pasi votoi në Budapest, e cilësoi pjesëmarrjen e lartë si një shenjë pozitive për demokracinë, duke theksuar se sa më shumë qytetarë të marrin pjesë, aq më i fortë është procesi.
Nga ana tjetër, lideri i opozitës Péter Magyar, gjithashtu votoi në kryeqytet dhe u shpreh se një pjesëmarrje rekord dhe një proces i rregullt zgjedhor mund të favorizojnë fitoren e opozitës.
Këto zgjedhje konsiderohen si ndër më vendimtaret në historinë e fundit të Hungarisë, pasi rezultati pritet të ndikojë jo vetëm në drejtimin e brendshëm politik, por edhe në orientimin strategjik të vendit në raport me Bashkimin Evropian dhe partnerët ndërkombëtarë.
