Deputetja e Partisë Demokratike, Albana Vokshi, ka denoncuar atë që e cilësoi si mungesë të plotë transparence nga ana e mazhorancës në lidhje me procesin e integrimit europian të Shqipërisë. Në një deklaratë për mediat nga Kryesia e Kuvendit, ajo u shpreh se qeveria po refuzon të informojë opozitën dhe Kuvendin mbi pozicionet negociuese për grupkapitujt III dhe VI, duke cenuar sipas saj parimet demokratike dhe standardet e kërkuara nga Bashkimi Europian.
Sipas Vokshit, integrimi europian nuk është pronë e qeverisë apo e mazhorancës, por një projekt strategjik kombëtar që i përket të gjithë shqiptarëve. Ajo theksoi se ligji detyron institucionet përgjegjëse të informojnë Kuvendin mbi ecurinë dhe përmbajtjen e negociatave, por ky detyrim po anashkalohet.
Deputetja demokrate ngriti shqetësimin edhe për ndërprerjen e transmetimit live të mbledhjes së Komisionit për Politikën e Jashtme, në momentin kur ajo kërkoi fjalën për procedurë lidhur me mungesën e informacionit mbi procesin negociues.
“Ky ishte një akt i qartë censure, jo vetëm ndaj opozitës, por edhe ndaj qytetarëve shqiptarë që kanë të drejtë të informohen mbi një proces që përcakton të ardhmen europiane të vendit,” deklaroi Vokshi.
Ajo shtroi disa pyetje publike ndaj qeverisë: përse refuzohen informacionet për Kuvendin, përse mungon transparenca dhe përse procesi i integrimit po trajtohet si një çështje e mbyllur politike.
Sipas saj, arsyeja lidhet me faktin se qeveria nuk dëshiron që publiku të njihet me problematikat e evidentuara nga Bashkimi Europian, si korrupsioni, standardet zgjedhore, pavarësia e institucioneve, respektimi i vendimeve të Gjykatës Kushtetuese dhe funksionimi i shtetit ligjor.
Vokshi kërkoi transparencë të plotë, llogaridhënie institucionale dhe përfshirje të opozitës në procesin e negociatave, duke theksuar se këto janë parime themelore të vetë Bashkimit Europian.
