Gjykata e Posaçme e Apelit për Korrupsionin dhe Krimin e Organizuar ka vendosur lirimin nga paraburgimi të biznesmenit Ervis Lami, i përfshirë në dosjen e tenderëve të Autoriteti Rrugor Shqiptar.
Vendimi vjen pasi më herët SPAK kishte kërkuar për të një dënim me 4 vite shërbim prove, duke marrë në konsideratë statusin e tij si bashkëpunëtor i drejtësisë.
Sipas hetimeve, Lami rezulton të ketë qenë pronar formal i kompanisë “DAAM shpk”, ndërsa pronari faktik dyshohet të ketë qenë Evis Berberi, ish-drejtor i ARRSH-së. Kjo kompani dyshohet se ka përfituar një numër të konsiderueshëm tenderash publikë me vlera të larta, gjatë kohës që Berberi mbante poste drejtuese në sektorin e energjisë dhe infrastrukturës rrugore.
Në vendimin e saj, Apeli i GJKKO ka ndryshuar masën e sigurisë “arrest në burg” të caktuar më parë, duke urdhëruar lirimin e menjëhershëm të Lamit, nëse ai nuk mbahet për ndonjë shkak tjetër ligjor.
Gjykata ka urdhëruar gjithashtu SPAK për ekzekutimin e këtij vendimi, ndërsa ka lënë të hapur mundësinë për rekurs në Gjykata e Lartë e Shqipërisë brenda 45 ditëve.
Dosja ku përfshihet Lami lidhet me akuza të rënda si “shkelje e barazisë në tendera”, “korrupsion pasiv”, “mashtrim me pasoja të rënda” dhe “falsifikim dokumentesh”, ku të pandehur janë edhe disa persona të tjerë, përfshirë ish-zyrtarë të lartë.
