Gazetari amerikan Fred Abrahams ka analizuar zhvillimet e fundit në Shqipëri përmes një shkrimi me titull “Flamingot zbuluan hendekun shqiptar”, ku argumenton se protestat e njohura si “Revolucioni i Flamingove” kanë nxjerrë në pah dallimin mes reformave të miratuara në letër dhe zbatimit të tyre në praktikë.
Sipas Abrahams, raporti i Komisionit Europian për Shqipërinë evidenton një hendek të vazhdueshëm mes legjislacionit dhe funksionimit real të institucioneve. Ai thekson se sfida kryesore e vendit nuk lidhet më me mungesën e ligjeve, por me mungesën e vullnetit politik për të garantuar sundimin e ligjit, luftën kundër korrupsionit dhe zbatimin e reformave.
Në analizën e tij, autori shkruan se protestat kanë vazhduar të rriten pavarësisht përpjekjeve për t’i diskredituar, ndërsa qytetarët shprehin pakënaqësi ndaj asaj që ai e përshkruan si një elitë politike që favorizon interesat private mbi ato publike.
Abrahams ndalet edhe te çështja e zhvillimeve turistike në zonat e mbrojtura, duke përmendur projektin e investimit të lidhur me Jared Kushner dhe ndryshimet ligjore që, sipas tij, kanë nxitur reagimin qytetar. Ai vlerëson se rezoluta e fundit e Parlamentit Europian ka kërkuar më shumë transparencë, forcimin e mbrojtjes së zonave të mbrojtura dhe rishikimin e kuadrit ligjor për investimet strategjike.
Sipas gazetarit amerikan, reagimi i qeverisë për kryerjen e një vlerësimi të plotë të ndikimit në mjedis erdhi edhe si rezultat i presionit të protestave dhe vëmendjes ndërkombëtare që ato kanë tërhequr.
Në fund të analizës, Abrahams argumenton se besueshmëria e procesit të integrimit europian varet jo vetëm nga miratimi i reformave, por edhe nga zbatimi i tyre në praktikë. Ai thekson se qytetarët që protestojnë kërkojnë zhvillim ekonomik të bazuar në ligj, transparencë dhe llogaridhënie, duke shtuar se Bashkimi Europian duhet të dëgjojë këto kërkesa nëse synon të ruajë besueshmërinë e tij në Shqipëri.
