Ish-kryetari i Bashkisë së Nju Jorkut, Eric Adams, është regjistruar zyrtarisht si banor në Njësinë Administrative Nr. 2 në Tirana, vetëm katër ditë pasi ka marrë shtetësinë shqiptare.
Lajmi është bërë publik nga drejtuesi i njësisë, Florian Pullazi, i cili e ka mirëpritur Adams në ambientet e institucionit lokal, duke theksuar lidhjen e tij të hershme me komunitetin shqiptar.
Sipas informacionit të publikuar, Adams ka nisur edhe procedurat për pajisjen me pasaportë shqiptare, duke formalizuar kështu statusin e tij si qytetar i Shqipërisë.
Në reagimin e tij, Pullazi e cilësoi ish-zyrtarin amerikan si “një mik të madh të shqiptarëve”, duke nënvizuar se marrja e shtetësisë përfaqëson një reflektim të marrëdhënieve të forta mes qytetit të Nju Jorkut dhe diasporës shqiptare në Shtetet e Bashkuara.
Eric Adams, i njohur për fokusin e tij në çështjet e sigurisë publike gjatë karrierës si ish-kapiten në Policinë e Nju Jorkut dhe më pas si kryebashkiak, ka shprehur vazhdimisht simpati dhe mbështetje për Shqipërinë dhe shqiptarët.
Regjistrimi i tij si banor në kryeqytet shihet si një hap simbolik dhe politik, që forcon më tej lidhjet mes figurave ndërkombëtare dhe Shqipërisë, në një kohë kur vendi synon të rrisë profilin e tij në arenën globale.
