Kryeministri Edi Rama ka ndarë në rrjetet sociale pamje dhe detaje nga mbledhja e zgjeruar e qeverisë dhe Grupit Parlamentar të Partisë Socialiste, e zhvilluar të shtunën.
Përmes një postimi në Facebook, Rama bëri me dije se në këtë takim u zhvillua një dëgjesë institucionale me drejtuesen e Agjencisë Shtetërore të Kadastrës (ASHK), ku u analizua ecuria e reformës në këtë sektor.
Gjithashtu, gjatë mbledhjes është diskutuar edhe reforma administrative-territoriale, në bashkëbisedim me kryetarin e komisionit përkatës, ku janë shqyrtuar skenarët e mundshëm për ndryshime në organizimin territorial.
Një tjetër fokus i rëndësishëm ka qenë kalendari kombëtar i aktiviteteve dhe përmbajtja e takimeve “Punët e Shqipërisë”, që pritet të zhvillohen në vijim në kuadër të komunikimit me qytetarët.
Në mesazhin e tij, Rama e shoqëroi publikimin me një urim për qytetarët, duke theksuar rëndësinë e koordinimit institucional dhe vijimit të reformave në sektorë kyç të administratës.
