Seanca gjyqësore për dosjen “Partizani” në Gjykatën e Posaçme Kundër Korrupsionit dhe Krimit të Organizuar është shtyrë sërish. Seanca e radhës është caktuar të zhvillohet më 12 janar.
Gjatë seancës së sotme, mbrojtja e ish-kryeministrit Sali Berisha paraqiti qëndrimet e saj përpara trupës gjykuese. Avokatja Klodiana Gjyzari argumentoi se Prokuroria e Posaçme nuk ka paraqitur prova konkrete që lidhin Berishën me veprime penale.
Sipas mbrojtjes, në aktet e akuzës mungojnë fakte të qarta për veprimet konkrete që pretendohet se ka kryer Berisha, si dhe pasojat e supozuara të tyre. Avokatja theksoi se gjatë procesit gjyqësor do të provohet se ndjekja penale ka motivim politik dhe synon cenimin e pluralizmit politik në vend.
Gjyzari deklaroi gjithashtu se faktet janë shtrembëruar dhe se përgjegjësia për vendimmarrjet e kohës i atribuohet padrejtësisht vetëm ish-kryeministrit, ndërkohë që vendimet janë marrë nga organe kolegjiale.
Në argumentimin e saj, mbrojtja vuri në dukje edhe kallëzimin penal, duke theksuar se ai nuk është bërë nga një shtetas i thjeshtë, por nga një përfaqësues i shumicës politike së kohës. Sipas saj, kallëzimi është depozituar në cilësinë e funksionarit politik dhe është regjistruar menjëherë nga Prokuroria, pa u ndjekur procedura e zakonshme e nisjes kryesisht të hetimeve.
Mbrojtja pretendon se pretendimet e kallëzimit lidhen me ngjarje të vitit 2008 dhe bazohen në marrëdhënien familjare të Malltezit me ish-kryeministrin e asaj kohe, pa prova konkrete që provojnë përgjegjësi penale.
