Presidenti amerikan Donald Trump ka rritur tonet ndaj Kina, duke paralajmëruar pasoja të rënda nëse Pekini vendos të furnizojë me armë Iran në mes të tensioneve në Lindjen e Mesme.
Deklarata e tij erdhi pas raportimeve se Kina mund të jetë duke përgatitur dërgimin e sistemeve të mbrojtjes ajrore drejt Teheranit. “Nëse i dërgon armë Iranit, Kina do të ketë probleme të mëdha”, u shpreh Trump, duke iu përgjigjur pyetjeve të gazetarëve mbi këtë çështje.
Sipas raportimeve të mediave ndërkombëtare, inteligjenca amerikane dyshon se Pekini po shqyrton mënyra për të furnizuar Iranin me sisteme kundërajrore, përfshirë armë të tipit MANPAD, të cilat përdoren për mbrojtje ajrore në distanca të afërta. Dyshohet se këto dërgesa mund të realizohen përmes vendeve të treta, për të shmangur vëmendjen direkte ndërkombëtare.
Një zhvillim i tillë do të kishte ndikim të drejtpërdrejtë në balancat ushtarake në rajon, duke forcuar kapacitetet mbrojtëse të Iranit në një moment kur tensionet me Shtetet e Bashkuara dhe Izrael janë në nivele të larta.
Këto paralajmërime vijnë në një kohë delikate diplomatike, pas dështimit të bisedimeve mes SHBA-së dhe Iranit në Islamabad, ndërsa rreziku i përshkallëzimit mbetet i lartë. Çdo përfshirje e mundshme e Kinës në mbështetje ushtarake për Teheranin pritet të komplikojë edhe më tej situatën dhe të rrisë tensionet në nivel global.
Ekspertët paralajmërojnë se përfshirja e fuqive të mëdha si Kina në këtë konflikt mund ta zgjerojë krizën përtej Lindjes së Mesme, duke e kthyer atë në një përballje më të gjerë gjeopolitike.
