Një analizë e Deutsche Welle vlerëson se lufta mes Iranit, SHBA-së dhe Izraelit ka ndryshuar ndjeshëm balancat e pushtetit global, duke krijuar fitues dhe humbës të rinj përtej Lindjes së Mesme.
Konflikti 40-ditor, i ndalur përkohësisht nga një armëpushim, ka shkaktuar pasoja të rënda për civilët dhe infrastrukturën, ndërsa ndikimi politik dhe ekonomik po ndihet globalisht.
Irani, megjithëse i goditur rëndë ushtarakisht dhe me humbje në lidership, ka arritur të mbijetojë dhe të negociojë nga një pozicion relativisht i qëndrueshëm, duke përdorur si levë strategjike kontrollin mbi Ngushticën e Hormuzit.
Shtetet e Bashkuara kanë arritur objektiva ushtarake, duke dobësuar kapacitetet e Iranit, por kanë pësuar kosto politike dhe dëme në reputacion, sidomos për shkak të mungesës së koordinimit me aleatët.
Izraeli ka shënuar sukses taktik në goditjen e objektivave iraniane, por përballet me rreziqe afatgjata dhe tensione në marrëdhëniet rajonale.
Në planin global, Kina dhe Rusia shihen si përfitues indirektë. Kina përfiton nga dobësimi i fokusit amerikan në Azi, ndërsa Rusia nga rritja e çmimeve të energjisë dhe zhvendosja e vëmendjes nga lufta në Ukrainë.
Shtetet e Gjirit kanë përjetuar një situatë të përzier, me përfitime ekonomike nga çmimet e larta të naftës, por edhe rritje të pasigurisë për shkak të sulmeve.
Evropa ka paguar koston ekonomike përmes rritjes së çmimeve të energjisë dhe tensioneve brenda aleancës transatlantike.
Ndërkohë, Pakistani ka dalë si një aktor diplomatik i rëndësishëm, duke ndërmjetësuar armëpushimin dhe duke forcuar rolin e tij në rajon.
Në përfundim, analiza thekson se megjithëse lufta nuk ka një fitues të qartë, ajo ka riformatuar ndjeshëm rendin gjeopolitik dhe marrëdhëniet ndërkombëtare.
