Zhvillimet në Këshillin e Mandateve lidhur me kërkesën e SPAK për heqjen e imunitetit të zv.kryeministres Belinda Balluku u shoqëruan me debat të ashpër edhe në një studio televizive.
Gazetari Anri Bala u përplas me deputetin e PD-së, Oerd Bylykbashi, duke ngritur pyetje mbi ligjshmërinë e mbledhjes së zhvilluar me dyer të mbyllura dhe mënyrën si po trajtohet kërkesa e Prokurorisë së Posaçme.
Gjatë debatit, Bala e pyeti Bylykbashin nëse mbledhja e Këshillit të Mandateve ishte ligjore, ndërsa ky i fundit iu përgjigj duke i kërkuar nëse kishte lexuar rregulloren përkatëse. Diskutimi vijoi me tone ironike, ku gazetari pranoi se nuk e kishte lexuar rregulloren, ndërsa Bylykbashi e cilësoi pyetjen si retorike.
Debati u fokusua edhe te prania e anëtarëve në mbledhje dhe qëndrimet e mbajtura nga përfaqësuesit politikë për kërkesën e SPAK, duke reflektuar tensionin e lartë politik që po shoqëron këtë çështje.
