Bordi i Transparencës ka vendosur uljen e çmimeve tavan për naftën dhe benzinën, duke reflektuar zhvillimet më të fundit në tregun e hidrokarbureve. Vendimi hyn në fuqi sot, më 10 qershor, në orën 14:00 dhe do të mbetet në fuqi deri në mbledhjen e ardhshme të Bordit.
Sipas vendimit të ri, çmimi maksimal i naftës për konsumatorët do të jetë 188 lekë për litër, nga 190 lekë që ishte më parë, ndërsa çmimi me shumicë është përcaktuar në 176 lekë për litër.
Edhe benzina ka pësuar ulje. Çmimi maksimal i shitjes me pakicë është vendosur në 171 lekë për litër, nga 173 lekë që ishte, ndërsa ai me shumicë në 159 lekë për litër.
Bordi ka paralajmëruar operatorët e tregut të karburanteve se zbatimi i këtyre çmimeve është i detyrueshëm. Në rast të konstatimit të shkeljeve, autoritetet kanë bërë të ditur se do të aplikohen masa administrative deri në pezullimin e aktivitetit të subjektit.
Në njoftim theksohet gjithashtu se çmimet aktuale mbeten nën kufijtë e përcaktuar nga Akti Normativ nr. 1, datë 3 prill 2026. Për pasojë, akciza mbi karburantet do të vijojë të zbatohet në nivelin e plotë, pra 100%, pasi nuk janë tejkaluar pragjet prej 220 lekësh për naftën dhe 200 lekësh për benzinën.
Ndërkohë, për sektorin e peshkimit, çmimi i gazoilit është llogaritur në 92 lekë për litër, duke përfituar nga përjashtimet fiskale të parashikuara në legjislacionin përkatës.
Autoritetet shprehen se do të vijojnë monitorimin e tregut për të garantuar mbrojtjen e konsumatorëve dhe funksionimin e konkurrencës së ndershme në sektorin e hidrokarbureve.
