Teksa politika shqiptare është përfshirë në një rrjet të pashembullt hetimesh dhe akuzash, figura të njohura të shtetit, përfshirë ministra, ish-ministra, kryetarë bashkie e ish-kryebashkiakë, drejtorë dhe ish-drejtorë, apo zyrtarë të lartë e politikanë duket se janë kthyer në objekt të hetimeve nga Prokuroria e Posaçme (SPAK). Të paktën 99 individë të lidhur me qeveritë e “Rama” dhe “Berisha”, apo edhe politikanë të pavarur, janë ndodhur në pozita ku kanë qenë nën akuzë, janë hetuar ose janë thirrur për të dëshmuar për çështje që janë subjekt i drejtësisë së re. Ky fakt, që shënon një moment të veçantë në historinë e drejtësisë shqiptare, tregon se SPAK-u, edhe pse institucion i ri, ka treguar një angazhim të qartë për të goditur korrupsionin dhe abuzimet në nivelet më të larta të pushtetit.
Politikanët që kanë mbajtur poste kyçe në administratën shtetërore, në ekzekutiv, legjislativ dhe pushtetin vendor, nuk janë kursyer nga hetimet që mbështeten në prova dhe denoncime, por gjithashtu edhe në rrethanat e ngjarjeve që lidhen me keqpërdorime të mundshme të detyrës. Kjo nuk është një histori e thjeshtë për individë që janë hetuar, por një tregues i një sistemi që ka filluar të përgjigjet për aktet e tij dhe që po ndëshkon një elitë politike që dikur e konsideronte ligjin si një mjet për të ruajtur privilegjet e saj.
Edhe pse shumë prej këtyre individëve janë ende nën hetim, disa janë arrestuar, disa kanë përfunduar në burg dhe disa janë thirrur në Prokurorinë Speciale për të dhënë llogari për veprimet e tyre, ky proces ka hapur një rrugë të re për transparencën dhe drejtësinë në Shqipëri. SPAK-u, pavarësisht vështirësive, ka krijuar një mundësi për të vënë përpara drejtësisë ata që deri dje e shihnin veten të paprekshëm. Hetimet që prekin qeveritarë të kaluar dhe aktualë, janë një provë se procesi i drejtësisë është më i fortë se pushteti i politikës.
Nga ish-ministrat e qeverisë “Berisha”, ministra e ish-ministra të qeverisë “Rama”, deri te drejtuesit e administratave të pushtetit lokal të Partisë Socialiste, një pas një, ata po përballen me pasoja. Ky është një sinjal i fuqishëm për politikën shqiptare, që duhet të kuptojë se gjithçka ka një çmim dhe se ligji është i njëjtë për të gjithë.
Detajet
Ndërkohë gazeta “SOT” po pasqyron listën e politikanëve, të cilët kanë trokitur në dyert e SPAK në pozita të ndryshme penale si: në cilësinë e personit nën akuzë, hetim apo që ka dijeni për rrethanat e ngjarjes. Madje SPAK nuk është kursyer ndaj secilit pushtet, qoftë ky ekzekutiv, legjislativ, vendor, por dhe gjyqësor (i cili nuk është reflektuar pasi nuk përbën shumë interes për publikun). Këto detaje dhe kjo listë është bërë publike nga avokati Besart Logu.
QEVERIA “RAMA 1”
- Arben Ahmetaj
- Saimir Tahiri
- Lefter Koka
- Olta Xhaçka
- Ogerta Manastirliu
- Sonila Qato
- Shkëlqim Cani
- Damian Gjiknuri
