Kryetari i Partisë Demokratike, Sali Berisha, ka reaguar sërish lidhur me ngjarjet e protestës, duke pretenduar se ndaj deputetëve të opozitës është ushtruar dhunë nga policia dhe se disa prej tyre janë proceduar padrejtësisht.
Në një deklaratë për mediat, Berisha akuzoi kryeministrin Edi Rama se po kërkon përballje civile dhe se, sipas tij, veprimet e autoriteteve janë të motivuara politikisht. Ai tha se disa deputetë të PD-së janë dërguar për ndjekje penale, ndërsa përmendi edhe emrin e Belind Këlliçit.
Sipas Berishës, Këlliçi është akuzuar për nxitje të dhunës në një kohë kur ndodhej në Shtetet e Bashkuara të Amerikës. “Belind Këlliçin e kanë dërguar për ndjekje penale për nxitje dhune, ndërkohë që ai ishte në SHBA, duke drekuar me një kandidat shqiptaro-amerikan për në Kongres në Miçigan”, deklaroi Berisha.
Ai e cilësoi këtë si provë, sipas tij, të një skenari të parapërgatitur dhe akuzoi qeverinë për manipulim të situatës. Berisha shtoi se opozita do të vijojë reagimin e saj politik, duke theksuar se, sipas tij, “kohërat e kësaj qeverie janë të numëruara”.
