Bashkimi Evropian nuk është ende gati të përcaktojë një datë konkrete për anëtarësimin e Ukrainës në bllokun evropian. Kështu deklaroi shefja e politikës së jashtme të BE-së, Kaia Kallas, gjatë Konferencës së Sigurisë në Mynih.
Sipas saj, shtetet anëtare nuk janë në një fazë ku mund të angazhohen me një afat të saktë kohor, duke theksuar se përpara Ukrainës ka ende shumë punë për t’u bërë në procesin e integrimit. Kallas nënvizoi se prioriteti aktual është mbështetja e vazhdueshme dhe demonstrimi konkret se Ukraina i përket familjes evropiane.
Deklarata vjen në një moment kur në qarqet diplomatike qarkullojnë informacione për mundësinë e një forme anëtarësimi të pjesshëm për Kievin, një hap që do të ishte i paprecedentë në historinë e zgjerimit të BE-së.
Procesi i anëtarësimit në Bashkimin Evropian kërkon përmbushjen e një sërë kriteresh politike, ekonomike dhe ligjore, të cilat zakonisht zgjasin me vite. Ndërkohë, lufta në Ukrainë dhe situata gjeopolitike kanë shtuar presionin për përshpejtimin e këtij procesi, por konsensusi i plotë mes vendeve anëtare mbetet ende i munguar.
