Çështja penale ndaj zv/kryeministres Belinda Balluku po hyn në një fazë vendimtare, teksa Prokuroria e Posaçme ka paraqitur prova të reja dhe kërkon heqjen e imunitetit të saj për të vijuar me masa më të rënda sigurie. Ndërkohë, institucionet kushtetuese dhe Kuvendi po përballen me një provë serioze funksionimi dhe pavarësie.
Këshilli i Mandateve dhe Imunitetit pritet të mblidhet pa një vendim përfundimtar të Gjykatës Kushtetuese mbi ankimin e qeverisë, duke hapur rrugën për shqyrtimin e kërkesës së SPAK për heqjen e imunitetit të Ballukut. Deri më tani, mazhoranca socialiste ka refuzuar ta trajtojë kërkesën, duke argumentuar se duhet pritur më parë vendimi i Kushtetueses.
Megjithatë, Gjykata Kushtetuese, edhe pse e mbledhur, nuk ka shpallur ende një vendim, duke kërkuar më shumë kohë për vlerësimin e çështjes. Kjo vonesë ka rritur tensionin politik dhe dyshimet për zvarritje institucionale, ndërsa afatet procedurale vijojnë të ecin.
SPAK e akuzon Ballukun për shkelje të barazisë në tendera në projektin e Tunelit të Llogarasë me vlerë rreth 190 milionë euro, si dhe e ka nën hetim për disa procedura të tjera të mëdha infrastrukturore, përfshirë lotët e Unazës së Madhe. Prokuroria argumenton se qëndrimi i saj në detyrë paraqet rrezik për hetimin, pasi mund të ndikojë në prova dhe të ushtrojë presion mbi dëshmitarë.
Pas pezullimit të saj nga GJKKO, kryeministri Edi Rama e çoi çështjen në Gjykatën Kushtetuese, duke pretenduar se gjykata ka tejkaluar kompetencat e pushtetit ekzekutiv. Si pasojë, Balluku u rikthye përkohësisht në detyrë, deri në vendimin përfundimtar të Kushtetueses.
Tashmë vëmendja është përqendruar te dy institucione kyçe: Gjykata Kushtetuese dhe Kuvendi. Vendimi ose mosveprimi i tyre do të përcaktojë jo vetëm fatin penal të Ballukut, por edhe raportin real mes politikës dhe drejtësisë. Nëse kërkesa e SPAK do të zvarritet apo bllokohet, rrezikohet të krijohet një precedent i fortë për pengimin e hetimeve ndaj zyrtarëve të lartë. Në të kundërt, një hap përpara do të shënonte një moment kritik për besueshmërinë e shtetit ligjor në vend.
