Një 38-vjeçar nga Burreli është arrestuar nga Policia e Tiranës gjatë një operacioni të koduar “Armed”, pasi u kap duke lëvizur me automjetin tip “BMW” dhe duke mbajtur armë zjarri automatike dhe municion luftarak.
I arrestuari është shtetasi Besmir Bajraktari, banues në Burrel, i cili ka precedentë të mëparshëm për veprën penale të armëmbajtjes pa leje.
Gjatë kontrollit të automjetit në Rrugën e Arbrit, shërbimet e Komisariatit të Policisë Nr. 4 gjetën dhe sekuestruan një armë zjarri automatike dhe municion luftarak, të cilat u morën si prova materiale së bashku me automjetin.
Bajraktari u procedua për veprën penale “Prodhimi dhe mbajtja pa leje e armëve luftarake dhe e municionit”.
Ky arrestim është pjesë e përpjekjeve të Policisë së Tiranës për parandalimin dhe goditjen e veprimtarisë kriminale në fushën e armëmbajtjes pa leje dhe rritjen e sigurisë në rrugët e kryeqytetit.
