Deputeti socialist Ardit Bido ka publikuar pamje nga një pallat në Sarandë, duke akuzuar deputetin demokrat Flamur Noka se ka përvetësuar banesa të destinuara për familjet e pastreha dhe ua ka dhënë familjarëve të tij.
Sipas Bidos, në vitin 2010 Enti i Banesave ndërtoi dy pallate për familjet në nevojë në qytetin e Sarandës. Ai pretendon se në pallatin me pamje nga deti dhe nga ishulli i Korfuzit u sistemuan familjarë të Nokës, ndërsa në pallatin tjetër pa pamje nga deti u vendosën familjet sarandjote që përfitonin nga programi i strehimit.
Në një video të publikuar në rrjetet sociale, Bido deklaron se disa nga përfituesit nuk kishin lidhje me Sarandën dhe jetonin në Kukës, Tiranë apo jashtë vendit, por sipas tij u pasaportizuan në Sarandë vetëm tre muaj para ndarjes së banesave.
Ai pretendon se mes përfituesve kanë qenë familjarë të Nokës, përfshirë vëllezër dhe të afërm të tij, të cilët nuk plotësonin kriteret për të përfituar si familje të pastreha.
Deputeti socialist shton se për këtë çështje kanë nisur edhe hetime nga SPAK, ku Flamur Noka dyshohet për fshehje pasurie, pastrim parash dhe shpërdorim detyre. Sipas akuzave, kur Noka ishte drejtor i Bordit të Entit Kombëtar të Banesave në vitin 2008, dyshohet se ka përdorur detyrën për t’u dhënë katër apartamente nga fondi i të pastrehëve familjarëve të tij.
Çështja ka rikthyer përplasjet politike mes mazhorancës dhe opozitës, ndërsa hetimet pritet të sqarojnë rrethanat dhe përgjegjësitë për ndarjen e banesave në atë periudhë.
